ნერგეტიკის დარგთან გვქონდა გულწრფელი  დიალოგი და მათთან ერთად ვცდილობთ, რომ სწორი, გამჭვირვალე, განჭვრეტადი მიდგომებით უზრუნველვყოთ სექტორის სწრაფი განვითარება“ - ეს განცხადება მარიამ ქვრივიშვილმა ბიზნესასოციაციის მიერ ორგანიზებული კონფერენციის ფარგლებში გამართულ პანელურ დისკუსიაზე გააკეთა.

მინისტრის თქმით, ეკონომიკის სამინისტროში ჩატარდა სრული ანალიზი იმის დასადგენად, თუ რამდენად საჭირო იყო  15 000 მგვტ-ზე გაცემული მემორანდუმები. მარიამ ქვრივიშვილის განცხადებით,  ასევე მოხდა, ერთი მხრივ, გადამყიდველი კომპანიებისა და პირების, ხოლო მეორე მხრივ, სერიოზული ინვესტორების იდენტიფიცირება, რომლებიც შექმნიან დამატებით სიმძლავრეებს ქვეყნის ენერგოდამოუკიდებლობისა და უსაფრთხოებისთვის.

„ჩვენი მესიჯი არის ძალიან მკაფიო - რა თქმა უნდა, ვიმოქმედებთ კანონის ფარგლებში, ვიქნებით სამართლიანები და ძალიან ხისტები ყველას მიმართ, ვინც არცერთ ვალდებულებას არ ასრულებს - მათ მიმართ ლმობიერება დასრულებულია.  ნახავთ, რომ  ჩვენს ენერგოსისტემას გამოუჩნდება ძალიან დიდი რესურსი იმისთვის, რომ ქვეყნისთვის მნიშვნელოვანი, მსხვილი პროექტების განხორციელება დაჩქარდეს“ - აღნიშნა ეკონომიკის მინისტრმა.

„ჩვენთვის უკიდურესად მნიშვნელოვანია დიალოგი ბიზნესთან, უკუკავშირის მიღება იმისთვის, რომ შევძლოთ გეგმაზომიერად, თანმიმდევრულად მივიღოთ ისეთი გადაწყვეტილებები, რაც, პირველ რიგში, დადებითაც აისახება კომპანიების და ყველა იმ ადამიანის სამეწარმეო საქმიანობაზე, რომელიც, საბოლოო ჯამში, უდიდეს გავლენას ახდენს ჩვენი ქვეყნის ეკონომიკის განვითარებაზე“ - ამის შესახებ მარიამ ქვრივიშვილმა განაცხადა. ეკონომიკისა და მდგრადი განვითარების მინისტრმა მონაწილეობა მიიღო კონფერენციაში „საქართველოს ეკონომიკის მიმოხილვა: მაკროეკონომიკური და სექტორული პერსპექტივები.“ საქართველოს ბიზნესასოციაციის მიერ ორგანიზებული კონფერენცია, რომელშიც მონაწილეობა მიიღეს სახელმწიფო და ბიზნეს სექტორების წარმომადგენლებმა, საქართველოს პრემიერ-მინისტრის,  ირაკლი კობახიძის გამოსვლით გაიხსნა.

როგორც კონფერენციის ფარგლებში გამართულ პანელურ დისკუსიაზე მარიამ ქვრივიშვილმა აღნიშნა,  ეკონომიკისა და მდგრადი განვითარების სამინისტროს მთავარი ღირებულებაა  დიალოგზე, კომუნიკაციაზე და ბიზნესთან კონსულტაციაზე დამყარებული გადაწყვეტილებების მიღება.

„კარგად გვესმის, რომ ბიზნესისთვის მნიშვნელოვანია სტაბილური, მდგრადი, მაგრამ ამავდროულად განჭვრეტადი გარემო - სწორედ ჩვენი სამინისტროს მთავარი ამოცანაა, რომ უზრუნველვყოთ ბიზნესისთვის ასეთი გარემო, რა თქმა უნდა, იმ მნიშვნელოვანი შიდაპოლიტიკური რეალობის მიღმა, რომელიც პოლიტიკურ სტაბილურობას ქმნის ბიზნესის და ეკონომიკის მდგრადი განვითარებისთვის. ეს არის სწორედ ის პოლიტიკა, რაზეც ჩვენ ვიზრუნებთ - ერთი მხრივ, გვაქვს მუდმივი დიალოგი კერძო სექტორთან, თუმცა, გამოვყოფ სამ ძირითად ფაქტორს, რაც მივიღეთ უკუკავშირად: სტაბილურობა და განჭვრეტადობა, არსებული ბიუროკრატიული მექანიზმების გამარტივება და გადაწყვეტილებების პროცესის აჩქარება, ასევე საერთო ხედვებზე დაფუძნებული სტრატეგია სექტორებში“, - განაცხადა მარიამ ქვრივიშვილმა.

პანელური დისკუსია „ბიზნეს ინსაიდერ საქართველოს“ დამფუძნებლის გიორგი აბაშიშვილის მოდერატორობით წარიმართა და მასში ეკონომიკისა და მდგრადი განვითარების მინისტრთან ერთად მონაწილეობა მიიღეს ფინანსთა მინისტრმა ლაშა ხუციშვილმა, ეროვნული ბანკის პრეზიდენტმა ნათია თურნავამ, ასევე „თიბისი ბანკის“ გენერალური დირექტორის მოადგილე ვახტანგ ბუცხრიკიძემ და „საქართველოს ბანკის“ გენერალურმა დირექტორმა არჩილ გაჩეჩილაძემ.